जिल्हांतर्गत व आंतर जिल्हा बदली पदावधीची परिगणना संदर्भ / अहर्ता दिनांक ३० जून बाबत शासन निर्णय दि ४ मे २०२२

जिल्हांतर्गत व आंतरजिल्हा बदली पदावधीची परिगणना,सेवा संदर्भ / अहर्ता दिनांक ३० जून बाबत शासन निर्णय दि ४ मे २०२२ 

        शासनाने दि ४ मे २०२२ रोजी बदली बाबत विशेषता बदली संदर्भ / अहर्ता दिनांक बाबत  GR निर्गमित केला आहे .GR च्या प्रस्तावने मध्ये असं सांगितलं आहे कि , जिल्हा परिषदेतील प्राथमिक शिक्षकांच्या जिल्हांतर्गत व आंतरजिल्हा बदल्या या ऑनलाईन पद्धतीने करण्याबाबतचा निर्णय शासनाने दिनांक सात एप्रिल 20२१ च्या शासन निर्णयान्वये घेतलेला आहे. सदर शासन निर्णय मध्ये जिल्हा परिषद शिक्षकांच्या बदल्या सामान्यपणे वर्षातून एकदाच दिनांक 1 मे ते 31 मे पर्यंत करण्यात याव्यात अशी तरतूद करण्यात आलेली आहे. तथापि 2019 मधील बदली प्रक्रिया 31 मे नंतर पूर्ण करण्यात आली होती. त्यामुळे बदली झालेल्या शिक्षकांना 15 जून नंतर शालेय कामी हजर व्हावे लागले. त्यामुळे सन 2019 च्या बदली प्रक्रियेतील अतिदुर्गम भागातील कार्यरत शिक्षक हे त्या पदावरील तीन वर्षाचा कालावधी दिनांक 31 मे 22 पर्यंत पूर्ण करीत नसल्यामुळे त्यांच्यावर सन 2022 मध्ये होणाऱ्या बदली प्रक्रियेमध्ये अन्याय होणार असल्याने यात सुधारणा करावी अशा स्वरूपाची निवेदने शासनाकडे प्राप्त झालेली आहेत. याकरिता  दिनांक 7 एप्रिल 2020 च्या शासन निर्णयातील 31 मे याऐवजी ३० जून 2022 अखेरपर्यंत परिगणना करण्याची बाब शासनाच्या विचाराधीन होती. या नुसार शासनाने असा शासन निर्णय निर्गमित केला कि,

 शासन निर्णय 

       सन 2022 मध्ये होणाऱ्या बदल्या करिता  पदावधीची  परीगणना दिनांक 31 मे ऐवजी दिनांक 30 जून 2022 पर्यंत करण्यास याद्वारे मान्यता देण्यात येत आहे. सदर प्रमाणे पदावधी ची परिगणना ही केवळ सन 2022 मध्ये होणाऱ्या बदल्यांसाठी लागू असेल.

३० जून संदर्भ/ अहर्ता दिनांकामुळे बदल्यांवर कोणता परिणाम होईल / बदली प्रकीयेमध्ये कोणता बदल होईल ?

१) संवर्ग एक मध्ये होणार  वाढ

             ज्या शिक्षकांचे  १ जून ते ३० जून पर्यंत वयाची ५३ वर्षे पूर्ण होणार आहेत , ते शिक्षक यापूर्वी संवर्ग एक मध्ये येत नव्हते पण या GR  शासन निर्णयाने असे शिक्षक देखील संवर्ग १  या संवर्गात येणार असल्याने या संवर्गातील संख्या काही प्रमाणात वाढणार आहे.

२) बदली अधिकार प्राप्त/ संवर्ग ३ शिक्षक संख्येत होणार वाढ

            २०१९ या वर्षी बदल्या जून महिन्यात प्रत्यक्षात आल्याने व यातील काही शिक्षक जून महिन्यात अवघड क्षेत्रात कार्यरत झाले होते. या GR मुळे  अशा शिक्षकांना बदली अधिकार प्राप्त म्हणून संधी मिळणार असल्याने संवर्ग तीन मधील संख्या काही प्रमाणात वाढणार आहे.

३) बदलीस पात्र (संवर्ग ४ ) शिक्षकांच्या संख्येत वाढ

          संदर्भ दिनांक ३० जून झाल्याने, १ महिना अवधी वाढल्याने, ३० जून पर्यंत ज्यांना सर्वसाधारण क्षेत्रात १० वर्षे पूर्ण व सध्याच्या  शाळेत ५ वर्षे पूर्ण होतील असेही शिक्षक बदली पात्र होतील व पात्र संख्या काही प्रमाणात वाढेल.

टीप : हा बदल फक्त याच वर्षीच्या बदल्यांकरिता असेल.